DRWS AGORED - BRECWAST MAWR

Fel y gwelwch o'r eitem blaenorol mae criw Drws Agored yn cwrdd yn wythnosol am baned, clonc a myfyrdod byr yn Neuadd Gellimanwydd. Nid oes tâl mynediad ond mae nifer yn rhoi cyfraniad am eu lluniaeth ac fel canlyniad rydym yn ystod y pymtheg mlynedd olaf wedi cyfrannu dros deg mil o bunnoedd tuag at achosion elusennol fel Ambiwlans Awyr Cymru, Marie Curie, Ffrindiau Ysbyty Dyffryn Aman, Mudiadau Cancr a Strôc lleol, Cymorth Cristnogol ac ati.

Beth am droi mewn atom ar fore Iau yn Neuadd Gellimanwydd rhwng 10.00 a 11.30 o’r gloch. Cewch groeso mawr. Y llynedd cafwyd Bore Coffi arbennig tuag yr elusen Macmillan ac fe godwyd dros £700. 

Eleni byddwn yn cynnal Brecwast Mawr Drws Agored fore Iau, Mai 19 i godi arian i Cymorth Cristnogol. Felly os am frecwast da galwch mewn rhwng 7.30 a 11.30 o’r gloch.

Dewch atom am glonc a chefnogi elusen teilwng yr un pryd. Cewch groeso mawr. 

DRWS AGORED - ESTYN CROESO

Roedd  drws agored yn wir ystyr y gair yng Ngellimanwydd bore Dydd Iau 28 Ebrill pan gafodd aelodau Cymdeithas Drws Agored  gyfle i estyn croeso i  gyfaill o Batagonia. Mae Elmer Williams yn byw yn Patagonia ac ar hyn o bryd ar ei wyliau gyda Hazel a Parry Charles Evans.  Hyfryd oedd cael ei groesawu i'n plith.

DERBYN AELODAU

Roeddem fel  eglwys  yn dathlu yn ystod ein hoedfa Gymun, bore Sul y Pasg, 27 Mawrth, pan oeddem yn derbyn pedwar o blant y capel yn aelodau llawn.

Yn ystod yr oedfa derbyniodd y Gweinidog Y Parchg Ryan Thomas, Rachel Smith, Sara Thomas, Dafydd Llywelyn a Mari Llywelyn, yn llawn aelodau o’r eglwys. Hyfrydwch oedd cael derbyn y pedawr sydd wedi bod yn ffyddlon yn yr Ysgol Sul a’u magu yn y capel.

Cymanfa Ganu

Cynhaliwyd Cymanfa Ganu Undebol Rhydaman a’r Cylch ar ddydd Sul y Blodau, 20 Mawrth yng Nghapel Gellimanwydd. Yr arweinydd oedd Mrs Helen Gibbon, Capel Dewi. Mae Helen sy’n hannu o Langynnwr yn soprano adnabyddus iawn ac yn ennillydd cyson yn yr Eisteddfod Genedlaethol. Yr  organyddes oedd Mrs Gloria Lloyd.

Cawsom ddwy oedfa. Yn y bore cyfle y plant oedd hi a braf oedd cael bod yno yn gweld a gwrando arnynt yn canu mor hyfryd.

Yna yn y nos daeth aelodau a ffrindiau  capeli yr ardal ynghyd ar gyfer Gymanfa llwyddiannus dros ben